Aruba ta na un punto crucial. E Plan Nacional di Accion 2023-2025, crea pa e gobierno anterior, ta presenta un strategia ambicioso pa transiciona e economia di Aruba na un modelo sostenibel, inclusivo, y resistente. E ta enfoca riba reduci e dependencia di e isla riba combustibel fosil, inverti den energia renobabel, fortalece produccion local di cuminda, y implementa construccion ecologico. Sinembargo, cu un gobierno nobo, e pregunta ta keda: Nan lo mantene e plan aki, of e cambionan politico un biaha mas lo hiba na abandono di politicanan y esfuersonan desperdicia?

Pa decadanan, Aruba a depende fuertemente riba turismo, pero e modelo economico aki tin su defectonan. Mientras cu e GDP a crece, e GDP real per capita a lucha debi na inflacion, costonan halto di importacion, y un falta di diversificacion economico. E plan di sostenibilidad tin como meta pa resolve e problemanan aki door di promove energia berde, siguridad alimentario, y un economia circular cu ta minimalisa desperdicio. Sinembargo, hopi di e iniciativanan aki ta rekeri compromiso a largo plaso—algo cu e historia politico di Aruba hopi biaha tabata falta. Gobiernonan nobo tin e tendencia di descarta of modifica manehonan anterior pa refleha e agenda di nan partido, hibando na inconsistencia y un falta di confiansa di negoshinan y inversionistanan.

E riesgo aki ta ainda mas significante awor. Ya cu e plan di sostenibilidad a wordo desaroya pa e gobierno anterior, e gobierno nobo tin cu dicidi si pa sigui uz’e como un guia of reemplas’ e cu nan propio strategia. Nan lo reconoce e balor di e vision a largo plaso aki y construi riba dje, of nan lo pone un banda añanan di investigacion y planificacion pa cuminsa di nobo? Si nan scoge e ultimo, Aruba un biaha mas por cay den e ciclo di tuma decision politico a corto plaso, unda manehonan ta cambia cada eleccion, y progreso significante ta bay perdi.

Apesar di e preocupacionnan aki, tin speransa. E cambio global den direccion di sostenibilidad ta nifica cu Aruba no por permiti su mes pa ignora e principionan presenta den e plan. Aliansanan internacional, inversionnan berde, y metanan climatico ta alinea cu hopi di e strategianan delinea den e rapport. Sinembargo, e berdadero prueba ta si e gobierno nobo lo compromete na e plannan aki, a pesar di diferencianan politico. Progreso berdadero ta rekeri continuidad, y e lidernan di Aruba mester pone interesnan di partido un banda pa priorisa e exito a largo plaso di e nacion.

Finalmente, e futuro di e esfuersonan di sostenibilidad di Aruba awor ta den man di e gobierno nobo. Si nan acepta e fundeshi estableci pa nan predecesornan, Aruba tin un chens real pa transiciona na un economia moderno, autosuficiente, y ecologico. Sinembargo, si nan bandona e plan na fabor di agendanan politico, e isla ta core riesgo di cay bek den politicanan anticua cu ta lag’e vulnerabel na instabilidad economico y degradacion ambiental. E proximo añanan lo determina si Aruba ta scoge progreso of ta keda pega den un ciclo di miopia politico.