Rednan Social no ta Suficiente, Entrega Keho Oficial!

Aruba tin un cultura rico di protesta duro y opinionnan habri, specialmente riba rednan social. Cada biaha cu algo bay robes—manera negligencia medico, abuso di poder, of manehonan cu ta bay robes—comentarionan skerpi ta circula rond. Pero kico ta bira evidente cada bes? Arubianonan ta prefera di expresa nan frustracionnan riba Facebook of dilanti di medionan di comunicacion en bes di haci e esfuerso pa entrega un keho oficial na e autoridadnan apropia. Dicon esey ta asina? Y kico ta e costo pa comunidad?

E cultura di keha versus tuma accion 

Tin un paradox remarcabel na Aruba: hende kier cambio y husticia pero ta aleha di e canalnan oficial pa logra esaki. Hopi institucion tin un comision di keho of un oficial responsabel pa investiga kehonan entrega y tuma medidanan apropia. Sinembargo, kehonan hopi biaha ta keda ausente. Ta miedo? Ignorancia? Of simplemente flohera?

Un argumento comunmente scucha ta cu hende no ta confia e institucionnan. Tin un creencia cu nada lo pasa cu e keho y cu ta djis un perdida di energia sin resultado. Pero e actitud ey ta sigura cu problemanan ta persisti y tin biaha hasta empeora. Sin un keho oficial, no tin un investigacion formal y, pues, no tin presion riba institucionnan pa cambia.

Rednan social: Grito pa atencion of cambio real? 

Rednan social ta ofrece un salida unda hende por desahoga nan frustracionnan sin filtro. Por sinti bon pa critica online, pero raramente ta trece cambio real. Un keho publica riba Facebook no ta wordo registra, investiga, of tuma na serio pa institucionnan. Ademas, hopi biaha e ta crea un presedente unda hende cu mesun pensamento ta afirma otro pero ta faya di propone solucionnan concreto.

Mientras cu tur hende ta grita online pa cambio, nada realmente ta pasa den practica. E keho ta perde den e archivo digital, sin ningun consecuencia legal of administrativo. Esey realmente ta con nos kier mehora nos sociedad?

Tuma responsabilidad por medio di accion

Cambio ta cuminsa cu accion. Nos no por sigui keha sin tuma pasonan realmente. Entrega un keho oficial ta nifica tuma responsabilidad y mustra cu bo realmente kier cambio. No ta suficiente pa djis mustra dede riba corupcion of abuso di poder. Tuma e tempo pa formula bo keho, entreg’e na e autoridad corecto, y sigui insisti riba un solucion.

Institucionnan, na nan turno, mester ofrece mas transparencia tocante con kehonan ta wordo trata y demostra activamente ki pasonan ta wordo tuma. Solamente e ora ey por restaura confiansa, y hende por wordo motiva pa registra nan kehonan oficialmente.

No djis keha, tuma accion! 

Arubianonan mester stop di sconde tras di rednan social y tuma pasonan real pa atende e problemanan. Ta tempo pa stop di pone tur responsabilidad riba gobierno y en cambio iguala palabra cu accion. Stop di djis keha online y tuma e pen pa entrega kehonan oficial. Solamente e ora ey nos tin un chens pa logra cambio y progreso real.