Esun cu ta sigui actualidad y medionan Arubiano di cerca, tin biaha ta haya e sintimento cu tin dos gobierno ta existi banda di otro riba e isla. Mientras cu e coalicion nobo ta carga e responsabilidad pa goberna e pais, e oposicion ta notabelmente visibel y activo. Loke ta resalta mas ta e frecuencia di nan aparicionnan den media, bishitanan na NGOnan, y combersacionnan cu tur sorto di instancia—actividadnan cu normalmente ta pertenece na e dominio di e gobierno actual.

Despues di tabata na poder pa shete aña nan mes, ta remarcabel cu e mesun partido di oposicion awor diripiente ta mustra asina envolvi cu e funcionamento di gobierno. Nan ta parce di lubida cu hopi di e puntonan di critica cu nan ta lanta awor a surgi of a wordo manteni bou di nan propio gobernacion. Duna critica riba infrastructura, maneho of dosiernan social cu a wordo laga den mal estado ta causa, p’esey, por lo menos asombro.

Trabou di oposicion critico ta parti di un democracia saludabel. Pero tin un liña fini entre haci oposicion y sembra confusion administrativo. E manera cu e ex-mandatarionan ta sigui comporta nan mes como si fuera nan ainda ta na mando no ta un curso normal di asuntonan. E ta parce mas bien un strategia conciente: via media y PR sigui eherce influencia, mina e maneho di e gobierno nobo y mantene apoyo publico.

E strategia aki ademas ta parce di tin efecto. Tin señalnan cu cierto ambtenaar y institucionnan ta sigui dirigi nan mes riba e structura di poder bieu. Cu tin un cierto lealtad ta humano, pero si esaki ta traduci den resistencia contra e gobierno actual, anto ta surgi stagnacion administrativo. Esaki no ta solamente no-profesional, sino tambe dañino pa e funcionamento di e pais.

E gobierno nobo pues ta enfrenta un reto dobel: no solamente goberna efectivamente, sino tambe duna ordo interno. Ta crucial cu e autoridad di e mandatarionan nobo wordo reconoci y respeta, sigur den e aparato publico. Ademas, e comunicacion pa publico mester bira mas fuerte y mas consistente. Un maneho di medio di comunicacion solido no ta un luho, sino un necesidad den un tempo unda formacion di imagen ta decisivo.

Tambe tin e LMA—e Landsverordening Materieel Ambtenarenrecht. Esaki NO ta un sindicato, sino e ley cu ta regla e derechonan y obligacionnan di ambtenarnan. E ta ofrece proteccion, pero tambe ta stipula exigencianan cla na comportacion, lealtad y ehecucion di tareanan. Un ambtenaar no ta un figura politico y no mester actua den interes di un partido, sino den servicio di e pais. Kende pa añanan largo a disfruta di proteccion y beneficionan bou di un cierto gobernacion, mester realisa cu temponan politico ta cambia. E ley ta valido pa tur hende, sin importa ken ta goberna.

NGOnan y otro institucionnan social naturalmente tin derecho di papia cu tur hende. Pero ta remarcabel con algun ta awor asina intensivamente den contacto cu e oposicion—despues di añanan di involucracion relativamente minimo. E interes repentino renoba aki ta lanta preguntanan tocante motibonan y interesnan.

Ta na e gobierno nobo pa tuma rienda bek. No door di confrontacion, sino door di stipula cuadranan cla. Door di ta visibel y transparente nan mes, y na mes momento duna ordo den e colaboracion cu e aparato publico. Un pais no por wordo goberna si e stuurwiel ta wordo hala constantemente.

E eleccion a pasa. E votador a papia. Ta tempo pa tur partido reconoce nan rol—oposicion inclui.