Mientras cu Venezuela ta habri investigacion riba e supuesto abuso di su ciudadanonan deporta for di El Salvador, un combersacion mas amplio di derechonan humano ta surgiendo: mientras cu Venezolanonan ta raporta maltrato den centronan di detencion stranhero, e condicionnan di prizon den nan propio pais ta keda entre esunnan di mas severo na mundo.
E siman aki, Fiscal General di Venezuela, Tarek Saab, a anuncia un investigacion formal contra Presidente di El Salvador, Nayib Bukele, y otro oficialnan despues cu mas di 250 Venezolano a regresa for di e mega-prison CECOT. E deportacionnan aki a tuma luga bou di un acuerdo entre Merca y San Salvador, invocando e Ley di Enemigo Stranhero di 1798. E personanan cu a regresa ta describi condicionnan horibel—violencia sexual, golpiamento, negacion di cuido medico, y cuminda incomibel.
Un di nan, Andry Hernández, un artista di makiyahe, recientemente a haci su storia publico. E ta bisa cu el a soporta cuater luna di tortura fisico y psicologico na CECOT, incluyendo herida di bala di rubber, isolacion solitario den scuridad, y cuminda cu tabata daña of contamina. “Nan a tratami manera un bestia,” el a bisa reporteronan na momento di yega Caracas.
Den un otro caso, Gregory Sanabria Tarazona—un ex-preso politico Venezolano tortura na e infame prison El Helicoide na Caracas—a wordo deteni pa ICE na Merca poco prome cu su audiencia di asilo. Gruponan di derechonan humano ta adverti cu su deportacion por pon’e bek den peliger, sea na El Salvador of na Venezuela.
Pero mientras e indignacion ta crece riba e reclamonan aki di abuso den exterior, atencion tambe ta birando pa e prizonnan di Venezuela mes, unda trato inhumano ta bon documenta y plama.
Facilidadnan manera El Helicoide na Caracas, Prison Rodeo I, y Tocorón na Aragua pa hopi tempo ta wordo critica pa organisacionnan di derechonan humano pa tortura rampante, exceso di preso, y control di gang. Na Rodeo I, presonan ta enfrenta isolacion solitario sin cama, awa limpi, of cuido medico—condicionnan cu e organisacion Robert F. Kennedy Human Rights ta yama “ekivalente na tortura.” Mientras tanto, Tocorón tabata practicamente dirigi pa e presonan mes te cu un intervencion militar na 2023, completo cu un piscina y un nightclub maneha pa lidernan di gang.
Na 2020, un disturbio na e prison di Guanare—causa pa scarsedad di cuminda—a laga 47 preso morto, subrayando e colapso sistemico di e sistema coreccional di Venezuela.
Organisacionnan di vigilancia internacional, incluyendo Nacionnan Uni y Human Rights Watch, a acusa e regimen di Maduro di uza detencion como un arma di represion politico. Raportnan ta detaya miles di aresto arbitrario, practicanan di tortura manera shock electrico y golpiamento, y e encarcelacion di mucha y lidernan di oposicion.
Ironicamente, hopi di e deportadonan cu awor ta reclama abuso den exterior a hui hustamente pa scapa di e sistemanan brutal aki na nan pais.
Gobierno di Venezuela ta bisa cu e lo continua investigando e reclamonan mara na e prizonnan di El Salvador y e deportacionnan relaciona cu ICE, pero criticonan ta yama e paso aki hipocrita. “Bo no por exigi husticia den exterior mientras bo ta neng’e na bo propio ciudadanonan,” un abogado di derechonan humano a bisa.
E situacion ta resalta un ciclo tragico: Venezolanonan cu ta hui di abuso hopi biaha ta wordo manda bek na un pais unda husticia y trato humano ta keda fuera di alcance. Y a menos cu tin un reforma significante—tanto na Venezuela como den e manera cu otro paisnan ta maneha solicitantenan di asilo—e patronchi aki probablemente lo continua.






0 Comments