SPORTING TA GANA UNITED Y TA BIRA LIDER ABSOLUTO

Apesar cu e campeonato di Division Honor Oro ta para pa Fecha FIFA, caminda nos seleccion Nacional a Sali pa Cambodia pa junga un wega amistoso, e team nan di Division Honor Plata si a mira accion den week end. Den Pool A tawata tin e wega mas cayente riba e calendario. E dos lider nan a topa otro cara cara pa wak ken ta e mihor team. Tawata trata di e Soldad nan di Sabana Liber, S.C. United cu tawata favorito pa gana e wega aki, contra e Super star nan di S.V. Sporting. E team di Sabana liber ta bin di golea e submarino Blau di Pos Chiquito, S.V. Unistar cu score di 12-1. Tambe e team di S.C. United ta yega e wega aki como e team mas goleador cu 22 gol anota den 3 wega y cu solamente 3 gol ricibi encontra. Antonio Fawcett nan delantero principal ta yega como maximo goleador di e torneo cu 10 gol riba su nomber. Den poco palabra, e soldad nan di Sabana Liber tawata yega cu moral halto,  sigur di nan mes y cu confiansa cu nan por Sali victorioso.  Di otro banda Sporting tambe tawata yegando cu 3 victoria y den su ulitmo wega ta dal e Millonario nan di Real Koyari cu score di 6-1. E super star nan tawata topando nan prueba mas fuerte di e campeonato y expctativa tawata grandi pa wak kiko e resultado di e wega aki lo bira. Jose Leonardo Pulido tawata e homber grandi e anochi aki pa e super star nan di Sporting marcando 3 gol, e promer biniendo na di 10 minuut di wega. E celebrashon di e bon comienso no ta dura mucho ya cu Julio Valverde ta iguala cos na di 13 minuut. Jose Leonardo Pulido ta bolbe pone Sporting dilanti na di 17 minuut pa haci e wega 2-1. Jhoan Vargas ta score na di 35 minuut pa haci wega 3-1 pa e superstar nan di Sporting  y ta Jose Leonardo Pulido cu ta score su di 3 gol di anochi pa amplia e ventaha net promer cu e promer tempo llega su final pa haci e wega 4-1. Den di dos tempo Antonio Fawcett ta aparece na di 59 minuut pa corta e ventaha na 4-2. Despues di e gol aki e soldad nan ta sigui preshona pero no ta logra probecha di e opportunidad nan cu nan ta hanja y asina e superstar nan di Sporting ta logra un victoria importante pa acumula 12 punto y tuma e liderato absoluto di e Pool A. E team di S.C. United ta keda  na di dos lugar cu 9 punto y lo mester recupera rapido di e derota aki pa sigui bringa pa logra e promer lugar di e grupo. Den otro resultado nan e team di RCS ta logra un victoria importante di 4-1 riba e Submarino Blau S.V. Unistars. E gol nan di RCS a ser marca pa Yong Heng Ye, Cristian Lopera y dos gol di Deymer Parayes. E gol di Unistars ta ser marca pa Ricky Engelbrecht. Cu e victoria aki RCS ta acumula 4 punto y ta pasa pa di 4 lugar lagando Unistars na di 5 lugar cu 3 punto. Diadumingo atardi tawata tin e wega di e Millonario nan di Real Koyari y e Pirata nan di Santa Cruz, Independiente Caravel. E team Koyarista ta logra un victoria di 3-1 pa asina ocupa e di 3 lugar riba e tabla di posishon. E gol Koyarista a ser marca pa Sean Cedric Labega cu a logra un doblete e a tardi aki y un gol di Zahir Nahim Boekhoudt. Mester menshona cu ambos jugador a hanja carchi cora e atardi aki lagando e team millonario bastante debilita den nan departamento ofensivo. E gol pirata ta ser marca pa Shamil Koolman. E derota ta laga e team di Santa Cruz den sotano di e grupo cu 1 solo punto.