Ken Mester Haya e Trabou?

Un candidato ta cana drenta un entrevista cu 20 certificado. Un otro tin un diploma universitario. Un di tres a pasa 15 aña eherciendo e trabou practico mes. Tur tres ta aplicando pa e mesun funcion. Ken mester haya e puesto?

Pa e dunadonan di trabou na Aruba, esaki no ta un pregunta teorico mas. E ta birando un dilema serio den un mercado laboral caminda e cantidad di credencial cu hende por acumula ta creciendo mas rapido cu e capacidad pa determina kico nan ta bal realmente.

Y kisas e pregunta mas incomodo ta esaki: ken ta verificando nan?

Na Aruba ya caba tin un distincion importante. Departamento di Enseñansa ta describi un diploma como prueba cu un persona a completa un programa di estudio legalmente regula, mientras cu un certificado generalmente ta demostra finalisacion di un curso teoretico of practico specifico cu hopi biaha no ta legalmente regula. Un certificado, pesey, no ta ekivalente na un diploma automaticamente.

E diferencia ey ta bira complica ora e certificadonan ta bini for di internet. Awe, un solicitante por lista titulonan di universidadnan, companianan di tecnologia, academianan priva y plataformanan online. Riba un curriculum vitae (CV), tur por aparece bao di e mesun cabes: CERTIFICACIONNAN. Esaki ta crea un ilusion peligroso di ekivalencia. Un persona cu 20 certificado por parce mas califica riba papel cu un persona cu dies aña di experiencia, pero esey no ta nifica 20 competencia comproba.

Pa diplomanan formal, Aruba tin proceduranan stipula caminda Departamento di Enseñansa por balora diplomanan stranhero y compara nan cu cualificacionnan Arubiano of Hulandes. Pero cu certificadonan e asunto ta diferente: e mesun directiva ta aclara cu Inspectie di Enseñansa ta certifica diploma y lista di cifra oficial, pero no ta certifica certificado di curso.

Si un persona presenta 15 certificado online, ken ta determina nan balor real? E dunado di trabou? Recurso Humano? Of ningun hende?

Esaki no ta nifica cu certificadonan no tin balor. Certificacionnan den industria por representa conocemento sumamente fresco y valioso, specialmente den tecnologia, ciberseguridad, contabilidad y maneho di proyecto. Pero e palabra “certificado” so ta bisa masha poco: cuanto ora e curso a dura? Tabatin examen supervisa? E instituto ta renombra? Y mas importante: e candidato por demostra e habilidad ey den practica?

E mesun pregunta ta conta pa e diploma: e ta prueba cu e persona a caba un estudio formal, pero e no ta garantisa cu e lo rindi miho cu un profesional cu basta experiencia riba tereno.

E berdadero reto no ta diploma contra experiencia, sino si e dunadonan di trabou ta capas pa midi tres cos apart: educacion, experiencia y competencia real. Kisas e cultura di reclutacion na Aruba mester move rumbo pa e pregunta mas decisivo durante e entrevista: “Mustra nos kico bo por haci realmente.” Pasobra ora credencialnan ta multiplica mas lihe cu e capacidad pa verifica nan, e mayor cualificacion riba un CV por resulta esun cu ningun hende a yega di comproba.