Na un of otro momento den caminda, internet a dicidi cu sufrimento ta un herment di marketing. Nos a bay di respeta resiliencia pa premia ken cu por conta e storia mas tristo cu e miho luz y descripcion. Bonbini na e era di e lucha glorifica, unda trauma no ta algo cu bo ta cura di dje — e ta algo cu bo ta monetisa.
Laga nos ta cla: berdadero dolor ta existi. Victimanan real ta existi. Sobrevivientenan real ta bringa batayanan tur dia cu mayoria di nos nunca ta mira. Pero e mundo digital a crea un rasa nobo di ‘clout chaser’ (buscado di atencion) — hendenan cu ta converti cada inconveniencia chikito den un storia pa yora, ta paket’e pa rednan social, y ta probecha di ‘likes’, simpatia y patrocinio. E ta ‘clickbait’ emocional.
E problema no ta solamente cu e ta falso of exagera. E ta cu e ta silencia e hendenan cu di berdad mester di yudansa. Ora bo ‘feed’ ta yen di ‘influencer’ yorando dilanti camera pa un pedido di koffie cu a bay robes, cuanto espacio ta keda pa e muhe cu ta hui di un cas abusivo, e famia luchando cu un crisis medico, of e mucha cu no por haya e terapia cu e mester? E oxigeno den e camber ta ser chupa pa esunnan cu ta grita mas duro, no esunnan cu ta den mas peliger.
Nos a crea un economia di atencion unda dolor ta paga. Y manera cualkier mercado, si tin ganashi, lo tin suministro — hasta si e ta fabrica. Algun hende ta gasta mas energia cultivando nan victimismo cu drechando nan bida di berdad. Mientras tanto, causanan genuino — esunnan cu ta salba bida, duna hende cuminda, of bringa inhusticia — ta keda dera bou di postnan actua y activismo di ‘hashtag’.
Ta ora pa stop di premia e comportacion aki. Stop di duna bo ‘views’, ‘clicks’ y simpatia na victimanan profesional cu ta trata tragedia como un ‘side hustle’ (un trabou extra). Cuminsa redirigi bo atencion na organisacion, hende y comunidadnan unda bo sosten di berdad ta conta.
Esaki no ta pa silencia storia di hende. E ta pa pone balor unda e ta pertenece. Tin un diferencia entre comparti bo lucha pa conecta y yuda otronan — y saca probecho di dje pa ganashi personal sin ofrece nada bek. Si bo “campaña di conscientisacion” ta djis abo yorando riba TikTok sin un ‘link’ pa un solucion, bo no ta un activista. Bo ta un actor.
E berdad ta cu e buscadonan di atencion no ta bay stop a menos cu e audiencia stop di wak. Y awo mes, e audiencia ta nos. Cada ‘click’, cada ‘share’, cada comentario di “bo ta asina fuerte” ta alimenta e mashin.
Pues aki ta e reto: ‘unfollow’ e comerciantenan di drama. Apoya e luchadonan silencioso. Duna bo placa, tempo y plataforma na e hendenan cu nan lucha ta real y cu nan esfuerso ta bay mas leu cu un ‘filter’. Pasobra mas nos trata dolor como un competencia, menos nos ta soluciona di berdad — y mas nos ta bira parti di e problema cu nos ta pretende di ta interesa den dje.
Dolor no ta un tendencia. Trauma no ta contenido. Y si bo ta interesa den lucha solamente ora e bin cu un ‘filter’ bunita y un ‘deal’ cu un marca, bo no ta parti di e solucion — bo ta parti di e circo.






0 Comments