Den un mundo unda nos por transferi placa cu un fingerprint, sigui consulta medico via video call, y hasta traha for di Bali, vota na Aruba ta keda sorprendentemente anticua. No tin voto via post, no tin e-voting, y sigur no tin posibilidad pa studiante of Arubianonan den exterior pa expresa nan voto. Pero dicon eigenlijk no?

Cada eleccion e mesun pregunta ta bolbe: dicon nos ta exclui miles di Arubiano pasobra nan no ta fisicamente riba e isla na e momento ey? Pensa riba studiantenan na Hulanda, trahadonan na Merca, of hende cu ta biba temporalmente den exterior. Nan tin un identidad Arubiano, nan ta sigui politica, y hopi ta paga belasting ainda of tin famia riba e isla. Pero vota? Esey ta solamente si bo ta aki.

Esey no solamente ta inhusto, e ta anticua tambe. Paisnan manera Estonia, Francia y India ta ofrece nan ciudadanonan metodonan di voto digital of alternativo — sigur, confiabel y inclusivo. Y si, e-voting ta nifica tambe cu nos por haya resultadonan di eleccion hopi mas lihe. No mas tempo di espera largo, no mas conteo manual te den oranan laat di anochi, sino procesamento real-time y resultadonan cla. Den un tempo di incertidumbre politico y media rapido, esey no ta un luho sino un necesidad.

Oponentenan di voto digital hopi biaha ta señala riesgonan: hackeo, fraude of storingnan tecnico. Pero hustamente cu siguridad moderno, manera autenticacion di dos factor y tecnologia blockchain, e riesgonan ey ta bira cada bes mas chikito. En bes di tene miedo di cambio, nos mester inverti den un sistema cu ta fortalece nos derecho di voto — no limita.

Ademas, e ta trata mas cu tecnologia so. E ta trata e principio: cada voto ta conta. Y si bo realmente ta kere den democracia, e ora ey bo mester haci e voto posibel tambe, sin importa unda un hende ta biba. Specialmente hobennan den exterior hopi biaha ta sinti nan mes desconecta di e isla, hustamente pasobra nan no ta wordo envolvi den nada. Duna nan e sentimento ey bek. Laga nan dicidi hunto riba e futuro di nan pais natal.

E sistema actual principalmente ta traha na bentaha di esnan cu ya ta biba riba e isla. Pero e diaspora Arubiano — studiante, profesional, famia hoben — hopi biaha tin ideanan fresco, experiencia den exterior y un otro perspectiva cu ta hopi necesario den e debate publico. E votonan ey por enrikece, renoba y hiba Aruba dilanti.

Tambe dentro di e isla e-voting lo ta un cambio grandi. Hende grandi, hende cu limitacion of hende cu mester traha riba dia di votacion, lo haya acceso mas facil na nan derecho. Mas accesibilidad ta nifica mas participacion — y un democracia mas fuerte y mas saludabel.

Loke ta strob’a nos no ta e tecnologia. Ta e voluntad politico. E disponibilidad pa bisa: “Nos kier envolve tur hende. Nos ta kere cu Aruba ta di nos tur, tambe di esnan cu ta biba un tiki mas leu.”

E solucion ta na nos alcance. Laga nos no warda te e siguiente eleccion pa bolbe ripiti e mesun excuusnan. Aruba ta cla pa futuro. Awor falta politica so.