Oficina di Maneho di Crisis (CMO) di Aruba ta informa cu pa di dos aña consecutivo, Aruba ta implementa e plan di siguridad (Veligheidsplan) pa Carnaval di Aruba. Pa e aña aki, a actualisa solamente informacionnan minimo den dicho plan, manera cantidad di participante, persona di contacto, configuracion di grupo y personanan di contacto. Controlnan a tuma luga y e gruponan a implementa loke ta prescribi den e plan, cu ta siguridad di cada persona den nan grupo.

Pre-Hospital

Nos tur conoce e motibo pakico a introduci e servicio di Pre-Hospital, cu ta pa reduci e cantidad di pashent cu ta bay Departamento di Emergencia di Hospital pa situacionnan cu kisas no ta di gravedad. Esaki ta alivia e presion riba e Departamento di Emergencia di nos Hospital. Door di trata e pashentnan cu no ta di gravedad na Pre-Hospital, unda tin personal profesional di Hospital presente, ta brinda un servicio mas eficiente. Pre-Hospital ta conta cu 5 miembro di personal di HOH, incluyendo 1 dokter. Esakinan ta atende intervencionnan chikito, pero den caso di cuido mas avansa, lo manda e pashent HOH. Departamento di Emergencia di Hospital (SEH) mester sigui brinda servicio na comunidad y na nos bishitantenan cu no ta participa na e celebracion di Carnaval.

Cantidad oficial di awe di poblacion registra di Aruba ta 108.123 (cien mil, cien binti tres), excluyendo cantidad di bishitante y otro persona.

Den e ultimo parada di Luz na Oranjestad, a atende un cantidad minimo di pashent. Pa e weekend final aki di carnaval, Pre-Hospital lo ta ubica na San Nicolas banda di Theresita Center, y na Oranjestad banda di Arutram. CMO ta gradici Arubus y Directiva di Theresita pa nan cooperacion.

Conseho di parti di CMO

CMO ta haci un peticion na comunidad completo pa demonstra un bon comportacion, pa asina tur hende cu a bin pa disfruta di Carnaval di Aruba, sea como participante of como espectador, por gosa sin preocupacion.

E team di CMO encarga cu e parti di logistica pa Pre-Hospital ta operacional. Personal den Pre-Hospital ta di Dr. Horacio Oduber Hospital y Cruz Cora Aruba. CMO ta haci un apelacion na tur persona cu ta bay e celebracion di Carnaval 2025 aki pa duna lo miho di cada un di nos. Na prome luga, cada un di nos mester percura pa nos mesun siguridad.

Cu esaki ta inclui:

• Pa esnan cu tin condicion di salud: pone bon atencion na bo salud. Departamento di Salud Publico ta duna recomendacionnan tur aña, pues sigui e consehonan aki.
• Si ta bay cu mucha, mayor of nan representante mester tene bon bista y percura pa nan ta bou di boso cuido tur momento.
• Ban respeta:
  • Nos autoridadnan.
  • Personal di DOW cu ta eherce nan trabou prome y despues di parada.
    • Duna un man ora di pone baricadanan pa no stroba nan y na final di parada kita tur loke abo a pone na e baricadanan aki pa facilita nan trabou.
  • Personal di Serlimar cu ta percura pa tene e cayanan limpi despues di carnaval.
    • Un apelacion na cada un di nos cu ta bay carnaval pa hiba un saco di sushi (aunke tin bari poni y ta parti saco prome cu parada) y tira nos sushi den e saco of bari pa facilita trabou di personal di Serlimar y asina nos tur ta contribui na un Aruba limpi. E no ta costa nos nada pa duna un man.
  • E gruponan.
    • Laga e participantenan di cada grupo disfruta y expone nan obra/creatividad riba cayanan di Aruba, no stroba nan pa haci nan show.
    • Personal di siguridad di cada grupo: si nan pidi bo como espectador pa hala un banda, sea cortes y haci esaki.
  • Organisacion SMAC.
    • Obedece ordo ora nan haci peticion na bo como espectador pa no stroba e parada.

Un punto di atencion

Riba ruta tin baricadanan, unda por constata cu despues di cada distancia tin un parti habri pa den caso di emergencia of mester saca un persona cu no ta forma parti di carnaval afo via e parti habri aki. Sea asina bon di laga esaki habri, pasobra esaki tin su funcion. No pone stoel, banki, etc. na e parti habri cu ta stroba y lo haya bo mes cada rato ta wordo pidi pa autoridadnan pa laga hende pasa, etc. Laga e espacio asigna pa vehiculonan di emergencia para liber. Corda cu kisas un di nan mester sali di urgencia, ya cu por ta un miembro di bo propio famia tin mester di ayudo, pero dor cu hende no a respeta e espacio aki, ta haci cu e vehiculo di emergencia no por duna su servicio na un manera rapido segun nan tin esaki den nan trabou.

Gradicimento

Pa finalisa, CMO ta gradici:

• KPA
• DOW
• IMSan
• DTI
• Serlimar
• Departamento di Salud Publico
• Cruz Cora
• Dienst Warenkeuring en Hygiëne di DVG
• SMAC
• Gruponan di Carnaval
• Personal di CMO
• Y tur cu di un of otro forma a aporta na e plan di siguridad (Veligheidsplan) pa Carnaval di Aruba.

Ban disfruta pa demostra cu nos por celebra un carnaval sin ningun incidente grave.