Loke mester tabata un weekend druk pero celebratorio di Dia di Mama a bira un prueba frustrante di biahe pa miles di pasahero na dos di e aeropuertonan mas druk di Merca. A emiti ‘grounding’ tanto na Newark Liberty International Airport na New Jersey como na Hartsfield-Jackson Atlanta International Airport na Georgia riba diadomingo, causando retraso y cancelacionnan general.

Na Atlanta, e Federal Aviation Administration (FAA) a confirma cu e grounding di avion a wordo emiti debi na un “problema cu ekiponan di pista.” E interupcion, cu a cuminsa tempran diadomingo mainta, a dura te alrededor di merdia. Mientras cu e problema tabata wordo resolvi, FAA temporalmente a baha e velocidad di yegadanan na e aeropuerto. Tecniconan a traha henter mainta pa drecha e problema di ekipo.

Segun e website di siguimiento di vuelo FlightAware, mas di 530 vuelo drentando y saliendo for di Atlanta a experencia retraso pa diadomingo atardi, cu tres vuelo cancela completamente. E incidente a añadi na e frustracion di e pasaheronan durante un weekend di fiesta cu ya caba tabata hopi druk.

Mientras tanto, Newark Liberty International Airport a wordo afecta pa un parada di avion na tera separa cuminsando pa 8:15 a.m., cu tambe tabata liga na un problema tecnico di FAA. Aunke a lanta e parada mas laat den dia, e efectonan tabata significante: mas di 150 vuelo a wordo retrasa y mas di 80 a wordo cancela.

FAA a splica cu e interupcion na Newark tabata debi na un problema di telecomunicacion na Philadelphia TRACON Area C, un facilidad crucial di control di trafico aereo responsabel pa maneha rutanan di vuelo drentando y saliendo for di e region. Mientras cu e backup di e sistema a traha manera tabata intenciona, trafico aereo a wordo baha como precaucion.

Esaki no ta e prome incidente asina na Newark. Apenas algun siman prome, un problema similar na TRACON a causa fayonan grandi di comunicacion, forsando controladornan di trafico aereo pa perde contacto temporalmente cu varios avion. E National Air Traffic Controllers Association (NATCA) a bisa cu durante e interupcion di 28 di april ey, controladornan a perde acceso tanto na radar como na comunicacion. E evento tabata asina serio cu algun empleado a wordo poni cu verlof bou di e Federal Employees’ Compensation Act.

Aeropuerto di Newark a enfrenta un serie di problema den e lunanan recien, incluyendo construccion, falta di personal, y fayonan di ekipo ripiti. Aerolineanan, specialmente United, a wordo forsa pa cancela of desvia cientos di vuelo como resultado.

E Secretario di Transporte Sean Duffy a trata e situacion den un entrevista cu “Meet the Press,” expresando preocupacion serio riba e confiabilidad di e sistema di espacio aereo di Merca. El a señala problemanan cu software y asunto di telecomunicacion como causanan principal y a enfatisa e necesidad pa solucionnan inmediato.

“Awor mi ta kere cu e luznan ta knipper, e sirenanan ta zona, y nan ta bisando, ‘Scucha, nos mester drecha esaki,’” Duffy a adverti. “Pasobra loke bo ta mira na Newark lo bay pasa na otro luganan den henter e pais.”

Aunke oficialnan di FAA ta bisa cu operacionnan a bolbe na normalidad na ambos aeropuerto, e caos di diadomingo ta un otro señal cu e sistema di aviacion di Merca por ta yegando un punto di kiebra.