California oficialmente a surpasa Hapon pa bira e di cuater economia mas grandi di mundo, Gobernador Gavin Newsom a anuncia e siman aki. E GDP nominal di e Estado a alcansa un impresionante $4.1 trilion, segun datonan fresco for di e Fondo Monetario Internacional y e Oficina di Analisis Economico di Merca. E cifra aki ta surpasa e $4.02 trilion di Hapon, posicionando California net tras di Merca, China y Alemania den e ranking economico global.  

E logro ta resalta e economia dinamico y diverso di California, impulsa pa industrianan principal manera tecnologia, entretenimento, manufactura y agricultura. Hogar di casi 40 miyon hende, e estado pa hopi tempo tabata un potencia pa innovacion y produccion. Gobernador Newsom a celebra e logro importante, enfatisando e compromiso di California pa inverti den hende, sostenibilidad y innovacion. “California no solamente ta mantene e ritmo cu mundo – nos ta pone e ritmo,” el a bisa den un comunicado, notando cu e exito di e estado ta construi riba politicanan cu ta mira pa futuro y un forsa laboral habilita.  

E prestacion economico di California a surpasa esun di otro lidernan global na 2024, cu un tasa di crecemento di 6%. Den comparacion, Merca en general a crece na 5.3%, Alemania na 2.9% y China na 2.6%. E subida di e estado na e di cuater puesto ta bin seis aña despues cu el a surpasa Reino Uni pa reclama e di cinco lugar. Sinembargo, Newsom a adverti tambe cu politicanan federal continuo por menasa e momentum aki. El a señala e strategianan di tarifa di e administracion Trump como un riesgo serio pa e salud economico di California, criticando loke el a describi como accionnan iresponsabel y ilegal.  

Siman pasa, California a bira e prome estado pa entama un caso legal contra e politicanan di tarifa di e gobierno federal. Gobernador Newsom a argumenta cu e Constitucion ta otorga Congreso, no e Presidente, e autoridad pa impone tarifa, y a enfatisa e daño economico potencial na e estado. “Ningun estado ta den posicion pa perde mas cu California,” Newsom a bisa den un conferencia di prensa, expresando preocupacion cu e daño causa pa e accionnan federal kisas no ta facil pa ‘reverse’.

Apesar di retonan persistente, incluyendo un scarcedad severo di vivienda pagabel cu ta alimenta un crisis di hende sin hogar, e poblacion y economia di California ta sigui crece. Turismo tambe a hunga un rol den e exito di e estado, aunke tensionnan for di e guera comercial a impacta e cantidad di bishitante. Turismo Canades, por ehempel, a baha cu 12% na februari compara cu e aña anterior. Como respuesta, California a lansa campañanan nobo pa atrae bishitantenan Canades bek. Aunke obstaculonan ta keda, e ultimo logro economico di e estado ta cementa su rol como lider no solamente nacionalmente, sino riba escenario mundial.