E sociedad Arubiano ta anhela un cuido di salud accesibel, di calidad, y sostenibel pa futuro. E exigencia aki no ta bin di expectativa excesivo, sino for di e realidad di un isla unda e demanda pa cuido ta crece, e poblacion ta bira mas bieu, y e presion di trabou riba personal di cuido ta aumenta structuralmente. Den practicamente tur sector di e cadena di cuido – for di dokter di cas te na enfermera, for di specialista te na personal di sosten – e ‘rek’ a caba. Y esey mientras e confiansa publico den e sistema ta bou presion.

Contra tur expectativa ta remarcabel cu e sistema di cuido financieramente tin algun espacio di maniobra. E Algemene Ziektekostenverzekering (AZV) ta cera su presupuesto cu un surplus – algo raro den e region. Tog e resultado positivo aki apenas ta wordo refleha den e realidad riba vloer di trabou. Tin señalnan di agotamento, cambio di personal, y motivacion bahando dentro di e sector, mientras cu tempo di espera y presion administrativo ta aumenta.

E Rol di AZV: Balansa entre Presupuesto y Necesidad

AZV cu razon tin e responsabilidad pa mantene e sistema financieramente saludabel, specialmente mirando e supervision for di Hulanda y e necesidad pa planificacion a largo plaso. Pero e pregunta cu ta bira cada biaha mas urgente ta si disciplina presupuestario so ta suficiente ora e necesidad fundamental pa capacidad di cuido y capital humano ta wordo ignora structuralmente. E surplus disponibel den e contexto aki no ta funciona como espacio pa fortalecimento, sino como un buffer cu no mag di wordo uza – cu como consecuencia un diferencia creciente entre medionan y necesidadnan.

Ademas, e silencio for di e top politico ta poco alentador. Posiblemente tin otro prioridnan di maneho – manera restaura poder di compra, atende e presion demografico of e diversificacion economico necesario pafo di e modelo di turismo sobrecarga. Pero salud publico no por permiti e priorisacion relativo ey. Salud no ta un opcion di maneho, sino un condicion necesario pa resiliencia social y stabilidad economico.

Un Yamada pa Inversion y Boluntad Politico

E yamada pa inversion ta bin for di e sociedad mes. Cuido di calidad no ta opcional. E ta rekeri escogencia politico: uzo dirigi di medionan, sosten pa profesionalnan di cuido, y re-evaluacion di trabou humano dentro di e sistema. Esey no mester nifica cu disciplina presupuestario ta wordo benta afo – si cu ta wordo haci escogencia activo dentro di e espacio cu tin.

Tanten cu esnan cu ta responsabel pa maneho ta keda duda, e sector di cuido ta keda den limbo: financieramente saludabel riba papel, pero operacionalmente bou presion. E inconsistencia aki no ta sostenibel riba termino largo. Si no tin boluntad politico pa traduci e mandato social pa cuido di calidad den accionnan concreto, e confiansa den e sistema lo sigui baha – cu tur e consecuencianan di esey pa e oferta di cuido, retencion di personal, y salud publico.

Cuido no merece solamente gratitud den palabra, sino sosten den acto. Awor ta e momento pa actua. No for di luho, sino for di urgencia.