Union Europeo ta aumentando e presion riba e plataformanan Chines di comercio electronico Shein y Temu pa motibo di un ola di producto insigur cu ta drentando Europa. Comisario di Husticia di UE, Michael McGrath, a bisa cu e tabata “shocked” pa loke investigadonan a descubri den un investigacion reciente di “secret shopper”—productonan cu ta presenta riesgonan serio pa salud y siguridad y cu ta viola regulacionnan Europeo.

E investigacion a revela chupon pa baby cu por kibra y causa peliger di stik, brilnan di solo sin proteccion UV, paña di mucha cu lasonan peligroso, y cosmetica cu kimiconan prohibi manera Lilial, cu a wordo conecta cu problemanan di fertilidad y daño na feto. Hopi di e productonan aki a drenta UE via gapnan den regla di aduana, normalmente manda den paketenan bou di €150—e limite pa tratamento liber di impuesto.

McGrath a subraya cu esaki no ta djis un problema pa e consumidor, sino tambe un problema di husticia pa empresanan Europeo. “Ta inaceptabel cu companianan estableci den UE mester cumpli cu reglanan di siguridad estricto y carga cu costonan halto di cumplimento, mientras cu algun bendedo stranhero ta manda productonan cu nunca lo pasa e controlnan mas basico aki,” el a bisa.

Pa pone man duro, Bruselas ta planeando reformanan amplio, incluyendo elimina e limite di €150 liber di impuesto, añadi cargonan di maneho pa cada pakete, y potencialmente crea un autoridad di aduana pa henter UE. E cambionan tin como meta pa reduci e entrada masivo di productonan cu no ta cumpli—rond di 12 miyon pakete di balor abou ta yega UE tur dia, cu un total di 4.6 biyon na 2024 so.

Plataformanan manera Shein, Temu, y AliExpress ya caba ta bou di presion di e Ley di Servicionan Digital di UE, cu ta haci e plataformanan responsabel pa articulonan peligroso y falsifica. Falta di cumplimento por hiba na multanan grandi.

Como reaccion, Shein a priminti di gasta $15 miyon pa mehora siguridad di producto, kita bendedonan cu no ta cumpli, y aumenta e testnan. Temu a bisa cu nan tin sistemanan proactivo na luga, pero no a dirigi nan mes directamente na e investigacion reciente di UE.

Pero e medidanan aki por pone presion riba e relacionnan entre UE y China. Oficialnan Chines ya caba a critica loke nan ta mira como accionnan discriminatorio contra nan empresanan di tecnologia y retail. Si e tensionnan escala, Beijing por tuma represalia via su propio hermentnan regulatorio—manera haci controlnan di aduana mas estricto riba productonan Europeo, restringi acceso pa marcanan di UE na China, of lansa kehonan na WTO tocante practicanan comercial inhusto.

Beijing por argumenta tambe cu e medidanan nobo di UE ta viola reglanan di comercio global door di dirigi nan mes inhustamente riba plataformanan Chines. Algun analista ta adverti cu esaki por hiba na un situacion di “ojo por ojo”, afectando combersacionnan comercial mas amplio y e lasonan economico entre e dos gigantenan.

E asunto por bira un tema cayente na e cumbre UE-China na Beijing mas laat e luna aki. Aunke McGrath a enfatisa cu proteccion di consumidor ta e prioridad principal, oficialnan Europeo ta consciente cu e medidanan por provoca un reaccion politico negativo.

“Nos kier productonan sigur pa consumidornan Europeo y trato husto pa empresanan Europeo,” McGrath a bisa. “Pero nos mester maneha esaki tambe cu responsabilidad, specialmente ora partnernan comercial importante ta envolvi.”