E yamada reciente pa introduccion di e Codigo di Bon Gobernacion na Aruba ta merece atencion, sigur awor cu e yamada aki ta bin di ex-minister Oduber tambe. E ta declara cu minister Cicilia mester implementa e codigo lihe. E yamada aki riba su mes ta corecto — bon gobernacion ta esencial. Pero ta remarkabel cu Oduber mes durante añanan largo no a implementa e codigo su mes, locual a duna espacio na nombramento basa riba relacionnan personal en bes di criteria obhetivo. Door di esaki, el a beneficia politicamente y den gobernacion di un sistema sin reglanan di wega transparente.

E Codigo di Bon Gobernacion tin como meta, entre otro, pa garantisa e independencia di miembronan di Conseho di Supervision (RvT). Un principio importante ta cu no mag tin lasonan estrecho entre un miembro di RvT y e minister responsabel. Den practica, nos ta mira sinembargo cu e principio aki hopi biaha a wordo ignora. Tin ehempelonan di partnernan di coordinadornan di gabinete cu ta ocupa posicion den organonan di supervision of funcionnan di liderazgo den institutonan gubernamental, y hasta un coordinador cu ta sinta den RvT locual ta mina e credibilidad di e supervision seriamente.

E pregunta fundamental ta si e personanan aki realmente por huzga di forma independiente den casonan unda nan partner ta co-responsabel den e maneho y politicamente. Nan lo tin curashi di tuma un punto di bista diferente of ta spera di nan, sea concientemente of no, pa sigui e liña ministerial? Hustamente pa evita e conflicto di interes aki, e Codigo di Bon Gobernacion no solamente mester wordo introduci sino tambe manteni estrictamente.

E problema ta cu reglanan di integridad na Aruba te awor a wordo aplica selectivamente. E codigo a keda durante añanan riba planki mientras cu e practica politico a continua manera semper. Amigonan, famianan y aliadonan politico a haya funcion asigna sin proceduranan di seleccion transparente of criteria cla. Cu hustamente un ex-minister cu a haci e sistema aki posibel, awor ta insisti riba introduccion rapido di e codigo, ta lanta pregunta riba su motibonan y ‘timing’.

Sinembargo, e momento a yega pa bolter pagina. Aruba tin necesidad di un cultura di gobernacion unda integridad, transparencia y responsabilidad ta central. E introduccion di e Codigo di Bon Gobernacion ta ofrece un fundeshi solido pa esaki, pero solamente si e wordo cumpli estrictamente. Esey ta nifica entre otro: no tin funcion dobel, no tin nombramento politico den organonan di supervision, y maneho consecuente na momento di violacion.

E confiansa publico den gobernacion ta na wega. Cambio real ta exigi cu tur esnan envolvi, sin importa nan pasado politico, tuma responsabilidad pa e restructuracion di integridad den gobernacion publico. E implementacion di e Codigo di Bon Gobernacion no por ta un slogan politico mas, sino mester bira un instrumento di maneho structural y controlabel — na servicio di e interes general.