Rednan social a haci e separacion entre nos bida profesional y priva mas difcil. Un potret subí durante fin di siman, un opinion politico publica anochi, of un comentario di frustracion tocante trabou por yega cerca un dunado di trabou y trece consecuencianan dialuna mainta.

Esaki ta lanta un pregunta importante pa Aruba: e red social di un empleado ta algo priva, of companianan por uz’e pa monitor nan trahadonan?

Ora un persona publica contenido via un cuenta accesibel pa publico, e informacion ey por wordo mira pa coleganan, clientenan, y dunadonan di trabou. Un post publico no ta e mesun cos cu un combersacion priva. Sinembargo, e accesibilidad ey no ta duna un dunado di trabou autoridad ilimita riba e bida personal di un empleado.

Causa pa Preocupacion

Tin situacionnan den cual e comportacion online por afecta e dunado di trabou di manera legitimo:

• Revela informacion confidencial di e empresa.
• Menasa coleganan of clientenan.
• Publica material di discriminacion conecta directamente cu e luga di trabou.
• Publica contenido cu ta daña e empresa mientras ta bisti cu e uniform di e compania, of presenta un opinion personal como posicion oficial di e organisacion.

Casonan laboral na Aruba ta demostra cu actividad riba Facebook por bira parti di un disputa di trabou. Cortenan por examina kico a wordo publica, si esaki tabata referi na e dunado di trabou, e gravedad di e conducta, y si e medidanan disciplinario tabata di manera proporcional. Un post no ta haci un despido legal automaticamente. E dunado di trabou mester establece un conexion real entre e conducta online di e empleado y e luga di trabou.

E Derecho riba Privacidad

E empleadonan ta conserva e derecho riba nan privacidad. Articulo I.16 di e Constitucion di Aruba ta reconoce e respet pa e bida personal y e proteccion di e informacion personal. E Ordenansa di Registro Personal di Aruba ta exigi tambe cu e informacion personal mester wordo adkiri di manera legal y uza di acuerdo cu su proposito intenciona.

Un compania mester wordo permiti pa crea archivonan cu ta contene opinionnan politico, creencianan religioso, relacionnan, y potretnan personal di e empleadonan? E gerentenan mester wordo permiti pa uza perfilnan falso pa pasa e ahustenan di privacidad? E trahadornan mester duna nan contraseñanan? Un empleo no mester duna un empresa acceso sin restriccion na e identidad priva di un persona.

Buscando un Ekilibrio Husto

Un dunado di trabou responsabel mester tin un maneho di red social cla y transparente, enfoca riba interesnan legitimo di e empresa, manera confidencialidad, siguridad, y e representacion di e organisacion. E manehonan aki no mester bira herment pa controla opinionnan personal legal.

Esaki ta particularmente importante na Aruba, caminda e comunidad ta chikito y e distancia entre e rednan personal y profesional ta limita. E dunado di trabounan mester separa e material cu nan no ta gusta for di e conducta cu ta daña e organisacion genuinamente. E empleadonan mester tene nan ahustenan di privacidad revisa y corda cu skirbi “mi opinion” no ta excusa menasanan of faltanan profesional serio.

E peliger ta cuminsa ora e monitoreo bira vigilancia. Un salario ta cumpra e trabou di un persona; e no ta cumpra e propiedad di su bida priva.