Hopi di nos tin un crema faborito of un lipstick scondi den baki cu nos ta uza solamente pa ocasion special. Pero mescos cu un paki di lechi tin fecha di vencemento, productonan di beyesa y cuido di cuero tambe por vence. For di e momento cu bo kita e tapa of habri e producto pa prome biaha, e proceso di degradacion ta cuminsa.

Uza un producto cu a pasa su tempo no ta djis inofensivo: e por tin consecuencianan directo pa bo cara y bo salud.

Ora un producto di beyesa vence, e preservativonan cu ta wanta bacteria y beskem leu ta perde nan forsa. Como resultado, micro-organismonan por cuminsa desaroya paden. Ora bo aplica esaki riba bo cutis, e por causa iritacion, alergia y puishi. Pio ainda: si bo cuero tin un rasca chikito of un herida habri, e bacterianan aki por provoca infeccionnan cutaneo serio.

Aki tin señalnan cla pa reconoce si un producto a pasa su tempo:

• Textura y consistencia: E producto ta cuminsa corta (schiften), bira awa, of haya clompi y bira diki.
• Holor y color: Si e holo fresco a cambia pa un holo rank of straño, of si e color a bira mas scur of geel, e ta bieu.
• Reaccion riba cuero: E no ta hunta facil mas y ta sinti pisa of pega riba bo cara.

Pa sa cuanto tempo un producto ta dura, busca riba e botter e simbolo di un wea chikito habri cu un cifra paden (por ehempel, 6M of 12M). Esaki ta indica cuanto luna e formula ta keda bon despues di habri’e.

E motibo dicon productonan a base di awa — manera bo crema di dia — ta vence mas lihe cu azetanan di cara of cabey ta pasobra bacteria y schimmel ta biba y multiplica hopi mas facil den awa. P’esey tambe, nunca agrega awa na un habon di baño of shampoo pa saca e ultimo pida: haciendo esey bo ta invita bacteria mesora. Si bo mester dilui’e, uza tur cos e mesun dia ey.

Ademas, un producto bieu ta perde su efectividad. Ingredientenan activo potente manera Vitamina C y Vitamina A (retinol) ta kibra lihe ora nan keda exponi na luz, aire y calor. Pa garantisa cu nan ta dura mas largo:

• Warda productonan cu antioxidantenan potente den frishider.
• Evita di laga bo skincare den baño, caminda humedad y calor constante ta putri e formula. Preferibelmente warda nan den un luga fresco y scur.
• Scoge botternan cu pomp (airless pump) en bes di botternan habri unda bo dedenan ta drenta tur dia.
• Laba bo skeironan y sponsnan di make-up por lo menos un biaha cada dos siman pa no plama bacteria bek riba bo cara.

Cuida bo cuero ta rekeri atencion na loke bo ta pone riba dje. Tira un bista riba bo coleccion awe mes: si e ta bieu, e miho desicion pa bo cutis ta bent’e afo.