Un Sentimento Nobo Ta Creciendo Riba Nos Isla?

Durante añanan largo, e lema “America First” tabata asocia cu Donald Trump, y hopi hende na Aruba a rechasa e ideologia su tras. E tono tabata zona demasiado nacionalista, demasiado confrontativo y enfoca riba pone interes Mericano riba cooperacion internacional.

Pero awe tin un pregunta diferente cu bal la pena haci: Aruba por ta desaroyando su propio version di “Aruba Prome”?

No como un imitacion di Trump, ni como hostilidad contra stranhero, ni como un slogan contra colaboracion internacional; sino como un exigencia creciente pa prome cu cada decision wordo tuma, un hende haci e pregunta simpel: kico esaki ta nifica pa Aruba?

E pregunta aki ta bira cada bes mas relevante mientras e isla ta cambia:

• E poblacion di Aruba a yega 109,435 persona den e di dos kwartaal di 2025, un crecemento impulsa principalmente pa migracion;
• CBS a reporta cu migracion drentando Aruba den e prome dos kwartaalnan di 2025 tabata 21.4% mas halto cu e mesun periodo na 2024;
• Pa final di 2025, casi 41% di e poblacion di Aruba a nace den exterior, representando personanan di 134 pais diferente.

E cifranan aki riba nan mes no ta haci migracion un problema, pero nan ta forsa un discusion serio riba capacidad di carga. Cuanto hende Aruba por acomoda sin cu cas bira impagabel? Cuanto presion nos careteranan, scolnan, cuido di salud, awa, coriente y servicionan publico por absorbe? Cuanto tereno mas por wordo desaroya? Y mas importante ainda: con crecemento economico ta traduci su mes den un miho calidad di bida pa esnan cu ya ta biba aki caba?

Aki ta unda e debate di “Aruba Promé” ta bira completamente diferente for di un simpel nacionalismo. Aruba por yama trahado stranhero bonbini pasobra cierto sectornan tin mester di nan. E por ricibi inversion for di exterior pasobra e ta crea trabou. E por sigui brasa turismo pasobra e ta keda e motor di nos economia. Pero habri porta no ta nifica entrega control.

Turismo mester sirbi Aruba; inversion mester beneficia Aruba; maneho di migracion mester cuadra cu necesidad di Aruba. Esaki no ta nifica “Arubiano so”; e ta nifica cu e interes di nos isla no por keda permanentemente den un di dos plano.

Kisas e sentimento cu ta lanta no ta “nos no kier stranhero”. Kisas e mensahe real ta: “Nos kier pa Aruba keda reconocibel como Aruba.”

Esey ta encera proteha nos Papiamento y nos cultura mientras nos ta keda conecta cu mundo; trece trahado unda tin berdadero scarsedad mientras nos ta garantisa cu oportunidadnan pa e yiu di tera no wordo lubida; y desaroya turismo sin asumi cu mas turista automaticamente ta nifica un miho bienestar pa nos pueblo.

Exito no por wordo midi simplemente pa cuanto turista yega, cuanto hotel lanta of cuanto e Producto Interno Bruto (GDP) subi, sino pa e capacidad di e ciudadano comun pa cumpra un cas, bishita dokter, gana un salario digno y lanta su famia riba un isla cu e por sigui yama su hogar.

Un slogan ta facil pa pronuncia. E reto grandi ta defini kico e berdadero interes di Aruba ta y kico nos como comunidad ta dispuesto pa proteha.