P’esey Mester Haci Entrada Ilegal Menos Atractivo

Na aeropuerto di Aruba, e sistema di control ta transparente: biaheronan ta pasa door di migracion formal, paspoortnan ta wordo controla y e ED-Card online ta duna autoridadnan informacion prome cu e avion aterisa.

Pero Aruba tin un otro frontera: su costa.

Diferente for di un aeropuerto, e costa no tin un balie di paspoort, un oficial di migracion ni un entrada controla cada par di meter. Ta lama habri, scuridad, boto chikito y kilometernan di caminda pa drenta. Pa hopi aña kaba, Aruba ta debati riba radarnan, patruyanan di Wardacosta y camaranan termico, mientras e drentamento clandestino pa via maritimo ta sigui sosode.

Tin un berdad incomodo cu Aruba mester admiti: bo no por cera e costa di un isla di manera completamente hermetico. Hende ta risca nan bida riba boto pa yega nos isla. E realidad duro ey mester obliga nos na haci un pregunta diferente: en bes di keda puntra con nos por frena cada boto riba lama, pakico e strategia no ta enfoca riba haci entrada ilegal completamente inatractivo ora nan yega tera?

Esey ta nifica cambia e calculacion economico:

• Drenta Aruba mester ta sumamente dificil y peligroso;
• Traha ilegalmente mester ta un riesgo grandi pa e dunado di trabou;
• Huur cas sin tin permiso valido mester ta casi imposibel;
• Y e beneficio financiero di esnan cu ta probecha di hende indocumenta mester keda destrui.

Si un persona por yega riba boto, haya trabou den cuestion di algun dia y huur un camber of apartamento sin cu esnan cu ta facilit’e ta haya castigo severo, e sistema mes ta keda crea e demanda. Dicon un hende ta risca su bida riba lama? Pasobra tin un oportunidad economico wardand’e na e otro banda. E incentivo ey ta loke mester ataca na su raiz.

Doñonan di trabou cu deliberadamente ta contrata personal sin permiso legal mester enfrenta sancionnan penal y boetnan substancial y consistente, no advertencianan bashi cu ta disparce den poco tempo, sino un control estricto (handhaving) cu ta pone e comerciante pensa dos biaha prome cu e tuma e riesgo. E mesun regla mester aplica pa casnan na huur cu ta facilita alohamento ilegal comercialisa.

Esaki no ta nifica criminalisa hende vulnerabel ni converti cada doño di cas den un polis di migracion. Pero si tin un diferencia grandi entre un situacion humano vulnerabel y un modelo di negoshi basa riba explotacion laboral y comercialisacion di vivienda ilegal.

Tecnologia, radar, cooperacion regional y patruya di Wardacosta ta keda vital pa salba bida y intercepta botonan na peliger. Pero tecnologia so no por soluciona un problema di incentivo economico.

Aruba no por cera henter lama rond di su costa. Pero loke Aruba si por controla ta loke ta pasa ora un persona pisa tera: kibra e facilidad pa haya trabou ilegal, blokia e alohamento iregular y sanciona severamente esnan cu ta haci negoshi cu e situacion aki. Ora e incentivo disparce, e cantidad di hende dispuesto pa risca nan bida riba lama lo baha drasticamente.