Aruba a bira sumamente habil den conta turista: nos ta conta yegada, anochinan di estadia, gasto, ocupacion hotelero, pasaheronan di crusero y e mercadonan di unda nan ta bini.

Pero tin un otro pregunta fundamental cu nos mester siña contesta: cuanto balor economico nos ta creando pa cada unidad di awa, energia, tereno, forsa laboral y infrastructura cu turismo ta uza?

Esey ta un midi completamente diferente. Na aña 2025, bishitantenan a gasta un suma calcula na USD 3.06 biyon na Aruba, segun datonan di Aruba Tourism Authority (ATA) basa riba mas di 8,000 encuesta na aeropuerto. E gasto diario promedio tabata USD 297, mientras cu e gasto promedio pa persona pa total di estadia tabata USD 2,019. Acomodacion a representa 38% di e gasto, cuminda y bebida pafo di hotel 13%, y cuminda y bebida paden di hotel otro 12%. E cifranan aki ta confirma e peso economico inmenso di turismo, pero nan ta djis conta kico e bishitante a gasta; nan no ta revela cuanto recurso natural y structural Aruba mester a consumi pa genera e entradanan ey.

Aki ta unda e siguiente generacion di statistica turistico mester cuminsa: kico lo pasa si Aruba cuminsa midi productividad turistico?

Imagina un dashboard oficial cu ta mustra no solamente e placa cu ta drenta, sino tambe:

• Balor turistico pa cada liter di awa desalina;
• Balor turistico pa cada kilowatt-uur di electricidad;
• Balor turistico pa cada camber di hotel;
• Balor turistico pa cada empleado den e sector;
• Balor turistico pa cada meter cuadra di tereno desaroya;
• Balor turistico pa cada kilogram di sushi produci.

E presion riba nos infrastructura ta bisto: na 2026, WEB a lansa inversionnan grandi di energia, incluyendo e expansion di RECIP-3 cu a hisa e capacidad di generacion for di 194 MW pa 230 MW, pa atende cu e demanda halto di turismo y actividad economico. Den mesun forma, e proyecto di reverse osmosis SWRO-3 ta diseña pa procesa entre 16,500 y 19,000 meter cubico di awa pa dia. E pregunta no ta si e inversionnan aki ta necesario; e pregunta ta si nos sa cuanto balor economico adicional turismo ta aporta compara cu e infrastructura pisa cu mester lanta pa sostene.

No tur turista tin e mesun impacto: un bishitante cu ta come den restaurantnan local, uza transporte di nos hendenan y cumpra arte local ta laga un beneficio directo den bario; mientras un otro cu ta keda sera den un solo resort ta consumi hopi awa y coriente sin laga casi nada atras.

Cu un poblacion residente di 109,435 persona, pero ricibiendo mas di 145,000 turista den un solo luna, Aruba no por sigui midi exito simplemente pa medio di kibra record di yegada. E berdadero meta strategico mester ta con pa genera mas balor, mas trabou digno y mas benta pa nos comerciantenan, uzando menos recurso pa cada florin genera. E futuro di nos turismo mester bira: cuanto beneficio nos por saca for di cada bishitante prome cu e costo pa nos isla bira mas halto cu e ganashi?