Durante generacionnan, psicologonan a observa e mesun patronchi humano: ora bida bira incomodo of pisa, hende ta busca un caminda pa haci e malestar ey disparce. Den pasado, hopi biaha esey tabata alcohol, sigaria, cuminda ‘junkfood’, wega di placa, compras compulsivo, sexo of exceso di trabou. E substancia of e actividad por varia, pero e funcion psicologico tras di dje ta exactamente mescos: scapa for di un emocion cu bo no kier sinti.

Awe, tin un mecanismo di escape nobo cu ta accesibel tur caminda y tur momento: e telefon inteligente.

Y cada bes mas, e huida aki no ta simplemente wak un mensahe of mira un video leuk. E ta bira un “scrollmento” sin fin—specialmente pasando door di noticianan negativo, alarmante y chocante: loke ta conoci internacionalmente como doomscrolling.

For di un bista psicologico, e pregunta principal no ta cuanto ora un persona ta pasa conecta riba pantaya, sino pakico e ta sigui bolbe na dje:

• Un persona ta ansha pa motibo di debe of falta di placa;
• E ta sinti soledad of ta infeliz den su relacion;
• E ta sobrecarga cu trabou;
• Of simplemente e no ta soporta e silencio y e fastidio di keda sin haci nada.

En bes di sinta y procesa e incomodidad ey, e man ta coy e telefon di biaha. Un video cortico ta bira dies; un noticia alarmante ta bira cincuenta; y un discusion ta transforma den un ora largo lesando comentarionan di desconoci. Di e forma ey, e emocion doloroso ta wordo tapa temporalmente pa un estimulo constante.

Estudionan cientifico internacional ta confirma e conexion estrecho aki: uzo problematico di rednan social y doomscrolling ta directamente mara na un subida den nivelnan di depresion, ansiedad, problema pa drumi y decadencia den bienestar mental. E celebracion negativo aki ta crea un trampa psicologico: e celebro ta keda busca e siguiente noticia pensando cu esey lo dun’e control riba e situacion, pero e alivio ey nunca ta yega.

Aki ta unda e analisis profundo ta bira esencial: e problema berdadero kisas no ta e telefon mes. E telefon ta simplemente e instrumento moderno pa scapa di realidad. E persona cu ta bebe alcohol despues di un dia fastioso kisas no ta busca e bebida mes, sino un respiro; esun cu ta come demasiado kisas no tin hamber fisico, sino hamber emocional; y esun cu ta pasa dos ora lesando desgracia y tragedia online kisas no ta buscando noticia, sino purbando na no pensa riba su propio bida.

Tin un peliger adicional cu ta haci smartphones hopi mas adictivo cu cualkier otro vicio: alcohol tin un limite fisico, un sigaria ta caba, y un plato di cuminda ta yega na su fin. Pero e feed di rednan social nunca ta caba. Semper tin un siguiente video, un siguiente pelea y un siguiente polemica wardando.

E berdadero reto no ta pa siña hende odia nan telefon, sino pa siña nan tolera e momentonan di silencio, incertidumbre, soledad y nan propio pensamentonan. Pasobra ora nos tapa cada emocion incomodo cu estimulo digital, nos nunca ta siña kico nos propio curason ta purbando di bisa nos.