Un temblor potente di 6.0 grado a dal oost di Afganistan diadomingo anochi laat, 31 di augustus, lagando un destruccion masal atras. Mas cu 1100 persona a ser confirma morto, y ta spera cu e cifra aki lo subi mientras cu esfuersonan di rescate ta continua den e provincianan montañoso di Kunar y Nangarhar.
E temblor, cu su epicentro cerca di e ciudad di Jalalabad, a dal net prome cu mey anochi y a ser sinti den partinan di Pakistan y India. Clasifica como un temblor superficial—esaki kiermen cu el a dal mas cerca di e superficie—el a desata un sacudi di tera severo cu a aplasta casnan, a causa deslisamento di tera y a dera famianan bou di material.
Autoridadnan local ta informa cu por lo menos 2,800 persona a resulta herida, hopi di nan den condicion critico. Pueblonan completo a ser bari for di mapa, y sobrevivientenan ta describi escenanan di devastacion: casnan reduci na stof, gritonan pa ayudo for di bou di daknan cu a basha abou, y famianan ta coba den e restonan cu nan man bashi.
E gobierno lidera pa Taliban a reacciona mandando helicopter, ekiponan medico y boluntarionan local pa yuda den buskeda y rescate. Sinembargo, camindanan daña, tereno dificil y replicanan frecuente—incluyendo temblornan di 4.5 grado of mas—a haci acceso na areanan remoto casi imposibel.
Gruponan humanitario manera e Media Luna Corra Afgano y ekiponan di emergencia di Nacionnan Uni tambe ta riba tereno, dunando tent, awa limpi, cuminda y cuido medico urgente. A pesar di e esfuersonan aki, trahadonan di ayudo ta adverti cu tempo ta cabando pa esnan cu ainda ta pega bou di e restonan.
“Esaki ta un careda contra tempo,” un boluntario di Media Luna Corra a bisa. “Nos ta haciendo tur loke nos por, pero e necesidadnan ta abrumador.”
E desaster aki ta yega mientras cu Afganistan ta enfrenta un convergencia di crisis: un economia cu ta luchando, un secura continuo y un sistema di cuido di salud satura. Hopi di e areanan afecta ya caba ta hogar di famianan desplasa y refugiadonan cu a bolbe, loke ta haci e urgencia pa alivio mas grandi ainda.
Oficialnan ta teme cu e cantidad di morto lo sigui subi segun cu raportahenan for di comunidadnan isola ta drenta poco poco. Algun pueblo ainda ta completamente desconecta debi na deslisamento di tera of infrastructura cu a basha abou, y hopi persona herida no por yega hospital.
E temblor ta un di e desasternan natural mas mortal cu a dal Afghanistan den e ultimo añanan. Apenas dos aña pasa, un temblor di 6.2 grado den zuidoost di e pais a mata mas cu 1,000 persona. Y na 2023, un temblor potente di 6.3 grado na Herat a resulta den mas cu 1,400 morto.
Afghanistan ta situa riba un liña di fayo tectonico grandi entre e plachinan Indio y Eurasiatico, loke ta hacie hopi propenso na actividad sismico. Pero e vulnerabilidad di e pais ta aumenta pa motibo di infrastructura pober y preparacion limita pa desaster.
Mientras cu famianan ta dera nan mortonan y ta cuminsa cu e proceso doloroso di reconstruccion, e necesidad pa sosten internacional ta urgente y ta creciendo. E liderato di Afganistan a pidi agencianan di ayudo mundial pa interveni, y gruponan humanitario ta apelando pa fondo pa expande operacionnan di alivio.
Pa awo, e hendenan di oost di Afganistan ta warda—den luto, cobando, y sperando cu mas bida ainda por ser salba for di bou di e material.






0 Comments